Expedición, Makalu 2015 ?

Nos últimos meses estiven preparando a que podería ser a miña vindeira expedición ao Himalaia, á 5º montaña máis alta do planeta, o Makalu (8.463 m). Como sempre, o máis difícil é conseguir os cartos necesarios para poder levar adiante unha expedición. A día de hoxe non teño eses cartos, cando a data de partida da viaxe esta prevista para principios do mes de abril.
No mes de outubro iniciei conversas cunha empresa viguesa e as perspectivas eran moi boas, o empresario mostrou interese en apoiarme patrocinando a expedición e propuxo un plan empresarial para conseguilo: a súa empresa e tres máis do seu grupo (ou afíns) aportarían cada unha a cuarta parte do patrocinio. Co transcorrer dos meses eses novos apoios non chegaron, inda que o empresario o intentou, ata esta mesma semana que deu por finalizada a súa participación no meu proxecto, ante a imposibilidade de conseguir as achegas necesarias. Agradezo o seu esforzo e apoio, inda que non frutificou; eu sabía que iso podía pasar, pero estaba convencido de que o conseguiría. Se non atopo patrocinador en breve, terei que descartar a expedición moi ao meu pesar, cando xa tiña moito avanzado.
Quero agradecer os ánimos de todos aqueles amigos, compañeiros e seguidores, que sempre "están aí", apoiando e ilusionándose con cada un dos meus proxectos, e en especial ás entidades, institucións ou empresas que a día de hoxe xa comprometeron a súa colaboración na expedición: Club Montañeiros Celtas, Federación Galega de Montañismo, TERRA deporte aventura, Ximnasio Saúde e Deporte, TERNUA, Concello de Vigo.