Recoñecemento da FGM

O sábado 16 de marzo, a Federación Galega de Montañismo (FGM) realizou a entrega anual de galardóns a todas aquelas persoas e entidades que, a xuízo da súa Xunta Directiva, se fixeron merecedoras de recoñecementos.

Un deses galardóns foime concedido pola realización da actividade galega máis destacada do 2012, o ascenso ao Annapurna.

Adolfo Puch, Presidente da FGM, tras unhas emotivas palabras fixo a entrega do galardón.

Foto: Xosé Antón Vázquez

Agradezo á FGM este recoñecemento así como o seu apoio na expedición ao Annapurna, que ademais de institucional, tamén o foi económico cunha cantidade modesta, pero significativa. En definitiva, a función básica da federación é a de apoiar os deportes de montaña e aos deportistas que os practican, e considero que está cumprindo na medida das súas posibilidades, tendo en conta que corren tempos difíciles tanto económicos como no compromiso dos colaboradores.

A FGM traballa polo desenvolvemento de distintas modalidades deportivas que se realizan na montaña: sendeirismo, escalada, alpinismo, excursións, carreiras por montaña, descenso de barrancos, esquí de montaña. Eu practico todas elas, inda que non coa mesma intensidade, cuestión de gustos ou prioridades.

Unha das vantaxes de estar federado é o acceso a cursos para a mellora técnica dos deportistas. Cursos nos que eu teño aprendido dalgúns dos mellores alpinistas de Galicia, instrutores da EGAM. Recomendable.

Sechu.